下边张相，呵呵，就系高一时，风靡全班（听下算啦）嘅5班三废，原本俾人咁叫我地都唔认嘅，唔知几时开始，就接受咗哩个称号啦，每次班入边有人生日，我地会送一个三废亲笔签名俾佢，署名系“三个风一样的男孩”（因为当时我个女Keita对日本当红组合W-inds嘅狂热，令到班入边无人唔识哩个组合，我地就系咁意凑合一下啦，呵呵）

     至于点解俾人叫三废，系因为我地三个从来唔讲废话，所以米俾人妒忌咯～～哈哈哈哈～

     我地送过俾人嘅生日礼物，印象有牙膏，旧式手电筒，烂鬼笔筒……最有特色嘅系一把我地三个亲笔签名嘅全白纸扇，好似仲有首诗嘅，唔记得咗～～哈哈，我地送亲嘅礼物唔系用报纸就系试卷包嘅，非常有特色～～啊，系啊，最有意义嘅一份礼物应该系我地三个大男人用咗一日时间砌嘅一幅小熊维尼拼图，原本系谂住买果阵叫人砌嘅，点知佢话1000块嘅最快都要两日，逼于无奈唯有自己砌，算系我地第一次嘅teamwork啦，大概用咗七个钟头搞点，再加埋我地个签名，完美无暇，哈哈，当然都系用报纸包啦～～点知果晚拆礼物果阵，发觉全部散晒，原来系块胶板上面系有张胶纸专门要来痴住唔俾佢散嘅，不过我地三个都唔识，所以白砌咗一日～～后尾砌翻之后发觉少咗一块，我地就称哩个叫做“缺陷美”～～哗哈哈～～

     唉，不知不觉都过咗咁多年咯，唔知将来我地都做咗人老豆果阵，谂翻起会点呢，呵呵，使唔使叫我地个仔组翻队新三废呢～～嗯，都系唔好，俾佢两个个仔教坏我个仔～～

     Anyway，无谓谂咁长远，因为今时今日，我地仲要一齐过光棍节，几何先有新三废嘅诞生～～～

     今日阿彪话我地系一齐过节，我话咁同以前一齐过情人节有乜分别，但阿彪话：“今天是完全属于我们的，情人节是完全不属于我们的！”俾佢激死，呵呵，唔知下年我地会唔会又一齐打牌过情人呢～～

 

     照片顺序，从左到右依次为  废彪， 废聪， 自己